बडोड़ो बिरो
बीरा झिरमीर, जामण जाया झीरमीर बरसलो मेह ओ बीरा नानी सी बून्द सवावणी जी ।
बीरा न्यूतो, जामण जाया न्यूतो नाइक र हाथ ओ बीरा थान तो नूतण धण गई जी ।
बाई न्यूतो, जामण जाई न्यूतो म्हासु झेल्यो ए न जाय ओ
बाई सांपत बोली बिराजी र धन घणो जी
सापतड़ी – सांपतड़ी गवाल्या र हाथ ओ
बीरा धनरो रखवालो मोबी डीकरो जी बीरा मेलो, जामण जाया मेलो खाण्डु तलवार ओ बीरा थांर चढ़ण रो तेजी घोड़लो जी ।
घोड़लीया, घोड़लीया घरां री जी शोभ ओ
बीरा खण्ड रो निपज्योड़ी जीमस्यां जी ।
बाई अबड़ा, जामण जाई अबड़ा सा बोल न बोल ओ बाई म्हे छां गढ़ां रा राजवी जी ।
म्हार आंगण, म्हार आंगण हूई जीमनवार ओ
बीरा देवरीयो नखरालो मोसो बोलीयो जी ।
भावज पेली, भावज पेली थांर बिरा न जीमाय ओ
भावज पछ कडुम्बो म्हार बाप रो जी म्हार आंगण, म्हार आंगण हुई ओढ़णवार ओ
विरा नणद चूड़लारी मोसो बोलीयो जी ।
भावज ओढ़ो, भावज ओढ़ो थांर बुगच रो बेस ओ
भावज ओढ़ो घण मोली बिराजी री चुनड़ी जी ।
म्हार मनड़, म्हार मनड़ म आई छ रीस ओ
बीरा ले चुकल्यो सरवर गई जी ।
सरवरीया, सरवरीया री ऊची नीची पाल ओ, बीरा ऊंची चतुं तो नीची ऊतर् जी, सुवटीया, सुवटीया धर्म रो जी बिर ओ बीरा देख घण देवा बिरा जीन आवता जी ।
बाई मन में, जामणजाई मनड़ म धीरज राख ओ बाई वो दल दीख विराजी रो आंवतो जी ।
बाई घोड़लीया, जामणजाई घोड़लीया री बाजी घुंघर वाल ओ बाई बैल्यां रा बाज्या टाली टोकरा जी
बाई भावजड्यां, जामण जाई भावजड्यां रा चमक्या छ चीर ओ ।
बाई भाई रे भतीजा रा मेमंद मोलीया जी ।
बीरा आडी फीर, जामण जाया आडी फीर पूछेंली बात ओ बीरा कीसड़ मारग होय आवीया जी ।
बीरा कांई थे, जामण जाया काई थे जायलड़ी रा जाट ओ बीरा कांई थे खियाल रा चौधरी जी ।
बाई नहीं म्हें, जामण जायी नहीं म्हे जायलड़ी रा जाट ए वाई नहीं म्हे खियाल रा चौधरी जी
बाई म्हे छां, जामण जाई म्हे छां जयकिशन सारा जोध ओ बाई कंवर दीपकलाल रा म्हे मामल्या जी
बाई केवो थार, जामण जाई केवो थांर मनड़ री बात ओ
बाई किसड़ी करांला ओढावणी जी ।
म्हार सुसरा, म्हार सुसरा न दृशाला ओढ़ाय ओ
बीरा सासु न साड़ी जी सांवटी जी ।
देवर जेठां, देवर जेठां न पीचरंग पाग ओ
बीरा दिवर जिठाण्या न पोमचाजी ।
बीरा नणदोई, जामण जाया नणदोई न पिचरंग पाग ओ
बीरा नणदां न साड़ी सांवटी जी ।
बीरा भाणेज्या, जामण जाया भाणेज्या रा भरज्यो थे भात हो बीरा कंवर कसुमल मोलीयो जी ।
म्हारा साहबजी, म्हार साहबजी न पाचु पोशाक ओ बीरा म्हान ओढ़ावो घणमोली चुनड़ी जी ।
म्हार कडुम्ब, म्हार कडुम्ब म लीलोड़ा नारेल ओ बीरा शहर सुपारी रुड़ी बांकडी जी ।
बीरो बैठ्यो, जामण जायो बैठ्यो छ तखत बिछाय ओ बीरा नौ गज धरती जी दल चढ्यो जी ।
बीरो आयो, जामण जायो आयो छ धगलो जी पेर ओ बीरा धगला म तबलो ले गयो जी ।
वीरो आयो जामण जायो आयो छ सुतण पैर ओ वीरा सुतण म मुसल ले गयो जी ।
भावज आई, भावज आई छ साड़ी जी पेर ओ भावज साडी म थाली ले गई जी ।
***