( लय : नखरालो देवरियो)
करती वन्दन सौ सौ बार आज दुनियां सारी।महावीर प्रभु री म्हें जावां सब बलिहारी ॥आं ॥
झिगमिंग-झिगमिंग करती देव्यां आरती उतारें हो।
देव दुन्दुभि बाजै नभ में धरती देव संवारे हो ॥
पग-पग पर फूलां री लगी है फुलवारी ॥१ ॥
आज उग्यो धरती पर सुरज फैल्यो जग में च्यानणियो। मिट्यों अंधेरो, माँ त्रिशला रो चम-चम चमक्यो आंगणियो ॥ महलां में खुशियां रा जल्या दिवला भारी ॥२ ॥
समवसरण में वीर प्रभु री छटा निराली छाई हो।
इमरत रस री बिरखा देव धरती पर बरसाई हो ॥
सुण-सुण कर हरस्या देव और सब नरनारी ॥३ ॥
मिलजुल सारा वीर प्रभु री एक साथ जय बोलो जी। ऊंचा-ऊंचा आदर्शा स्यू अन्तर का पट खोलो जी ॥
है शिक्षा, प्रभुवर री मनुज हित सुखकारी ॥४ ॥
भक्ति भाव स्यू वीर प्रभु रा भक्त मंडल गुण गावै जी। आंखडल्यां रा तारा म्हारा प्राणा स्य भी प्यारा जी ॥ रहसी जुग जुग बांरो तो जगत ओ आभारी ॥५ ॥