(लय : बधाओ गावो)
भीखणजी स्वामी!
भीखणजी स्वामी! भारी मर्यादा बांधी संघ में।
प्रबल प्रतापी शासन वीर रो, जिण में जग रही जगमग ज्योत हो ।।
१. देखी दशा दयामणी, आ तो साधु-संघ की आप हो । कांप्यो कळेजो म्हारै पूज्य रो, किन्ही मूल सहित थिर थाप हो ।।
२. सकल साधु अरु साधवी, बहो एक सुगुरु री आण हो । चेला-चेली आप आपरा, कोई मत करो, करो पचखाण हो ।।
३. गुरु-भाई चेला भणी, कोई सूंपै गुरु निज भार हो । जीवन भर मुनि-साहुणी, कोई मत लोपो तस कार हो ।।
४. आवै जिणनै मूंड नै, कोइ मति रे बधाओ भेखहो
पूरी कर-कर पारखा, कोई दीक्षा देणी देख हो ।।
५. बोल श्रद्धा आचार रो, कोई नवो निकळियो जाण हो । मत चरचो जिण-तिण कनै, करो गणपति वचन प्रमाण हो ।।
६. जो हिरदै बेसै नहीं, तो हि मत करो खींचाताण हो । केवलियां पर छोड़द्यो, आ है अरिहंतां री आण हो ।।
७. उतरती गणि-गण तणी, कोइ मत करो, मत सुणो सैण हो । संजम पाळो सांतरो, कोई पल-पल छिन दिन-रैण हो ।।
८. अपछंदा गण स्यूं टलै, कोई एक दो त्रिण अवनीत हो । साधु त्यांनै सरधो मती, कोई मत करो परिचय-प्रीत हो ।।
९. इत्यादिक नियमे भस्यो, कोई लेख लिख्यो गुरुराज हो । संवत अठारै गुणसठै, कोई माह सुदि सप्तमि साज हो ।।
१०. वार्षिक उत्सव आज रो, कोई होवै तिण उपलक्ष हो । दूरदर्शिता देखल्यो, कोई जयगणि री परतक्ष हो ।।
११. शहर सरदार सुहामणो, है चार तीरथ रा झंड हो । ‘तुलसी’ तेरापंथ ओ, कोई जुग जुग अटल अखण्ड हो ।।
रचयिताः आचार्यश्री तुलसी