गिगो
गिगा एक सेर गेवां रे कोई कांई होसी रे, म्हार दशोटण री लापसी होय जासी रे।
म्हार होय ज्यासी र उबर जासी रे, म्हार भुवा बाई र कोथलीयो घल जासी र ।
गिगा इसड़ी अकल कुण दीनी रे, म्हान इसड़ी अकल दादीजी दीनी रे।
थार दादी जी सरीसो तूं ही होसी रे।
गिगा एक गज कसुम्ब रो काई काई हुसी रे, म्हार झुगला र टोपी होय जासी रे।
म्हार हूय ज्यासी र उबर जासी रे, म्हार माताजी र कबजो होय जासी रे।
गिगा इसड़ी अकल कुण दिनी रे, म्हान इसडी अकल नानीजी दिनी रे।
गिगा नानी जी सरीसो मंगतो होयसी रे ।
गिगा एक भरी सोना रो कांई काई होसी रे, म्हार कड़ा र कंठी होय जासी रे।
म्हार हूय ज्यासी र उबर जासी रे, म्हार भुवाबाई र अंगुठी होय जासी रे। गिगा इसड़ी अकल कुण दिनी रे, म्हान इसड़ी अकल दादोजी दिनी रे।
गिगा दादोजी सरीसो सेठ होसी रे ।
***
न्हावण को बधावो
ओतो ए सैयां ओतो दादाजी र जायो पोतो, ए म्हैं घर जास्यां ।
दादीजी र जायो पोतो ए म्हें घर जास्या ।
घर ज्यास्यां ए म्हारी सैया, म्हार नगर बधावो कैंया ए म्हें घर जास्यां ।
एटो ए सैयां एटो बाबाजी र जायो बेटो ए म्हें
बडीयाजी र जायो बेटो ए म्हें
पापाजी र जायो बेटो ए म्हे … मम्मी जी र जायो बेटो ए म्हें
घर जास्यां ए म्हारी सैयां, म्हार नगर बधावो कैयां ए म्हें
अतीजो ए सैंया अतीजो, काकाजी र जायो भतीजो ए म्हें …
भुवाजी र जायो भतीजों ए म्हें …
इरो ए सैयं इरो वेन भाया र जायो बिरो ए म्हें घर जास्यां ओयतो ए सैया ओयतो नानाजी र जायो दोयतो ए म्हें घर जास्यां नानीजी र जायो दोयतो ए म्हें घर जास्यां आणेजो ए सैंया आणेजो मामाजी र जायो भाणेजो ए म्हे….. मासीजी र जायो भाणेजो मामीजी र जायो नाणदो ए म्हें घर…….. घर जास्यां ए म्हारी सैंया म्हार नगर बधावो कैयां ए म्हें घर जास्यां
***
जलवा का गीत (चूड़ो)
गोखां तो बैठी धण रो मन गयो, म्हारो मीणघट उरो रे बुलाय राजीडा लाल चूड़ो पेराय ।
एकुण जी चूड़ल रा गायकी, कोई ए कुण खरचला दाम, राजीड़ा लाल चूड़ो पेराय । सुसराजी चूड़ल रा गायकी, म्हारा जेठसा खर्चला दाम राजीड़ा लाल चूड़ो पेराय । बिच म स्यूं मारुजी ल्यायीया म्हारी गोरी धण जायो लाडण पुत राजीड़ा लाल चूड़ो पेराय चुड़लो तो पेर र जलवा पुजीया, कोई लाग्या सासुजी र पांव राजीड़ा लाल चुड़ो पेराय सैला जी हुज्यो जी सपुतड़ा म्हार जाया रो बधो परीवार राजीड़ा लाल चूड़ो पेराय । बुलावो जी पंडीत जोशी न म्हार चूड़लरो मोहतं कढ़ाय राजीड़ा लाल चूड़ो पेराय । बार बडो दीतवार जी थे तो पेरोनी दीतवार राजीड़ा लाल चूड़ो पेराय । बुलाबोनी नणद सवासणी म्हार चुडल र राखी बांध राजीड़ा लाल चूड़ों पेराय । बुलावो बाइसा थारो बीर न म्हार चुड़ल रो नेग चुकाय राजीड़ा लाल चूड़ो पेराय । सेर मीठाई रुपीया डोइस कोई ओ थार चूड़ल रो नेग राजीड़ा लाल चूड़ो पेराय । सेर दसेरा राजीन्द ना सर काई ल्याओजी धड़ी रे तुलाय राजीड़ा लाल चूड़ो पेराय । गोत बड़ो है म्हार सुसरा रो, कोई गुड़ डलीया बंट जाय राजीडा लाल चूड़ो पेराय ।
***